အကျွန်ရို့အငယ်ချေခါကဆိုကေ ရွာမှာ ဆီး ကွမ်း စသည်ဖြင့် ဖေ့သာ မပါပဲဝယ်ကတ်ခရပါရေ။
ယင်းဖေ့သာ မပါပဲဝယ်စွာကို အကျွန်ရို့ မိဖ အဖိုး အဘောင်ရို့တိက ဒါဒေါင် ၀ယ်လာခ ဖေ့သာ နောက်ခါမှပီးမေလို့ပြောခရပါရေ။
အေပိုင်နိန်ယင်းနန့် နှစ်ပေါင်းကြာလာလီ စကားလုံးအသုံးတိကပြောင်းလာကတ်ပါရေ။ လူမျိုး ရောနှော တိုင်းတစ်ပါးသားတိနန့် ဆက်ဆံလာရရေခါ တရွိ့ရွိ့ချင်း ပြောင်းရွိ့လာပါရေ။
ယင်းအချေခါက ပြောသံ တိစွာ အေဂနိန့်အချိန်မှာ ကလေချေ ကလေ့မယ်ချေတိ ပဇာ့က ပြောသံကြားလာရစွာတိက အကြွီး လတ် ။ ဆိုင်တိမှာလေ့ အကြွီး မရောင်းပါ အကြွီး သည်းခံပါ စသည်ဖြင့် ရွီးထားကတ်စွာတိတွိ့ရပါရေ။ အေ အသုံးချေတိစွာ ပြောင်းမှန်းမသိ ပြောင်းလာပါရေ ။
ယေခါ အဂု အချေတိက ကိုယ့်စကားကို အတွက်မပေါ်ပဲ အကြွီး . အကြွီး ဆိုပနာ သုံးနှုန်းမှုတိ များလာသည်နန့်အမျှ ကိုယ့်စကားကို ပြန်သတိမရပဲ အကြွီး ကိုရာ အမှန်ဟုထင်နိန်ကတ်ပါရေ။
ယင်းအသုံးအနှုန်းတိစွာ မသိမသာနန့် ပျောက်ကွယ်လာစွာတိကို အကျွန့်အနိန့်နန့် အမှတ်ရမိပါရေ။
နောက်လည်း တစ်လုံးအတွက်ပေါ်မိပါရေ။ ယင်းချင့်ကတော့ အကျွန်ရို့ သူငယ်ချင်းတိနန့် စကားပြောဆိုကတ်တေခါ စာပီ ဗဟုသုတနန့် တစ်ခြားသော အမြင်ချေတိကို တစ်ယောက်နန့်တစ်ယောက် အတင်အချ စကားပြောကတ်တေခါ မင်းက ကိုယ့်ကိုကိုယ် ကကောင်း အထင်ကြီးရေ သူများကိုကျကေ ကကောင်းဗင်လေ့အထင်သေးရေ ဂါးအေသူ ။ မင်း ငါ့ကို အထင်သေး စွာလား ။ အထင်မသေး ဂေ့ဝေတချက်။ ယင်း စကားထဲမှာ အထင်ကြီး အထင်သေး လို့မြင်တွိရပါရေ။
ကြီး သေး ဆိုစွာ ဗမာဝေါဟာရ တစ်ခုဖြစ်ပါရေ။ အကျွန့်အမြင်က ရခိုင်မှာဆိုကေ ကြီးရေ ငယ်ရေ လို့ ပြောလေ့ ပြောထဟိပါရေ။ အထင်ကြီးရေ အထင်ငယ်ရေ ဆိုသော အသုံးအနှုန်းက ပိုပြီးကေ သဘာဝကျရေလို့ ယူဆမိပါရေ။ ယင်းစကားကို ပြောသူတိလည်း ကကောင်းနည်းပါးလာစွာတိကို တွိ့ရပါရေ။
ပြောမှန်းမသိ ပြောနိန်ကတ်စွာတိက ပြောင်းမှန်းမသိ ပြောင်း ပျောက်ကွယ်မှန်းမသိ ပျောက်ကွယ်လာပြီးကေ ရခိုင်အသုံးအနှုန်း ရခိုင်ဝေါဟာရတိစွာ အနှုတ်လက္ခဏာ အဖြစ် ဂနိန့်အချိန်မှာ မြင်တိ့နိန်ရပါရေ။
ယင်းအတွက်တာကြောင့် ဒါဒေါင်နန့် အထင်ငယ် စကားလုံးတိကို အချင်းချင်းတိ ပြောဆို အချေအငယ်တိကိုလည်း ပြန်ပြောပြခဖို့ဆိုကေ ပိုပြီးကေ တန်ဖိုးဟိပါလ်ိမ့်မေ။ နောက်လေ့ အသုံးအနှုန်းချေတိကို ဖော်ပြပီးနိုင်ကတ်ပါစီ။
ရက္ခ၀ံသ
No comments:
Post a Comment